Акафист Пресвятой Богородице пред иконой Пюхтицкой
Чудотворные иконы Пресвятой Богородицы по алфавиту:
А Б В Г Д Е Ж З И К Л М Н О П Р С Т У Ф Х Ц Ч Ш Э Ю Я
Кондак 1
Избранную от всех родов Божию Матерь и Царицу Небесную, непрестанно у Престола Сына Своего молящуюся о нас, с любовию благодарно восхвалим. Восхотев бо во всех концех земли видети прославление величия Божия, возблаговолила еси, Преблагословенная, воздвигнути спасительныя обители Своя. Такоже и воззревши на страдания православных страны Прибалтийския, посетила еси край сей Своею благодатию, да утешенные Тобою зовем Ти сице:
Радуйся, Любвеобильная, слезы сердец наших милостивно осушающая.
Икос 1
Ангели на небеси и пастыри эстляндския веси зело удивишася, егда узреша Матерь Божию, на горе стоящую и руци долу простирающую, указующе на место сие святое, промыслительне имеющее прославитися. Тем же и мы, обрадованнии велицею Твоею к нам милостию, вопием Ти:
Радуйся, жребием Своим гору Афонскую наименовавшая; радуйся, многими чудесы иконы Твоя ознаменовавшая. Радуйся, чудотворною иконою честнаго Успения Твоего Киево-Печерскую Лавру прославившая; радуйся, знамением Своея божественныя стопы Почаевскую Лавру освятившая. Радуйся, Богородицкую гору в Пюхтицах Сионом Прибалтийскаго края соделавшая; радуйся, Успенскую обитель зде основавшая и великаго пастыря святаго праведнаго Иоанна Кронштадтскаго ей даровавшая.
Радуйся, Любвеобильная, слезы сердец наших милостивно осушающая.
Кондак 2
Видяще православных твердое веры исповедание и жертвенное их, даже до крови, ереси лютеровой противостояние, нечестивии тевтоны в эстляндстей стороне православие жестоко угнеташа, святии храмы сожигаша и разоряша, и всуе прещаша верным право славити Христа Бога нашего и воспевати Ему: Аллилуия.
Икос 2
Разумев Промышление Божие в дивнем явлении Твоем на горе эстляндским пастырем, людие гору ту Святою, Пюхтицкою, прозваша и милосердие Твое купно воспеша:
Радуйся, милостивым Твоим оком на угнетение верных рабов Твоих призревшая; радуйся, скорби их скоро отмстившая. Радуйся, Пресвятая Мати Божия, под благий покров всех собирающая; радуйся, без святыя помощи Своея никого не оставляющая. Радуйся, многая лета отрадою и утешением Пюхтицкаго края и окрестных весей пребывающая; радуйся, надежду спасения всем подающая.
Радуйся, Любвеобильная, слезы сердец наших милостивно осушающая.
Кондак 3
Госпожу Пречудную узревши, лазурным светом озаренную, устремися к ней эстляндский пастырь. Но исчезновением видения и паки его появлением умудрен быв, яко тое от Бога есть, возопи со страхом: Аллилуия.
Икос 3
Дивное видение другом и сродником стремяся показати, призва их пастырь, вкупе с ним, воззрети на Госпожу Пречудную, на верху горы стоящую. Видевше же Ея исчезновение, егда приближахуся им, и светозарное Ея сияние, егда удаляхуся, со страхом Божиим воспеша сице:
Радуйся, гордым противящаяся; радуйся, смиренным благодать подающая. Радуйся, детскую веру лжеименному разуму предпочитающая; радуйся, в чудесех и видениях Своих токмо чистым душам открывающаяся. Радуйся, веро, надеждо, любы и мудросте христианския; радуйся, покрове, не крыющийся от притекания взыскующих Тя.
Радуйся, Любвеобильная, слезы сердец наших милостивно осушающая.
Кондак 4
Бурю внутрь имея помышлений сумнительных, селяне веси сей на верх горы течаху и, дошедше до места стояния Чудныя Госпожи Лазоревыя, в разщелине дуба икону Успения Божия Матери обретоша и гору сию Богородицкою прозваша. Оттолеже близ дуба, явлением святыя иконы Твоея прославленнаго, часовню для хранения ея людие православныя воздвигоша и крестными ходы ю почиташа, купно Тя, Пречистая, славяще и воспевающе Богу: Аллилуия.
Икос 4
Слышавше о чуде явления Матери Божия на Богородицкой горе в Эстляндии, стекахуся людие от всех сторон земли Русския, радовахуся видевше новое явление милосердия Твоего, о Богомати. Сего ради благодарственно вопием Ти сице:
Радуйся, Предивная Госпоже, на спасение православных эстляндскаго края явившаяся; радуйся, милость Свою людем Твоим ниспославшая. Радуйся, икону святую Свою верным на поклонение даровавшая; радуйся, знамением многих чудотворений ю прославившая. Радуйся, местом благочестивых размышлений дуб, освященный Твоим явлением, соделавшая; радуйся, пристанищем скораго слышания тайных и сокрушенных молитв часовню, хранившую святую икону Твою, ощутимо явившая.
Радуйся, Любвеобильная, слезы сердец наших милостивно осушающая.
Кондак 5
Хотящи православным людем Эстляндския страны дати обилие видимыя благодати, чрез цельбоносную воду святаго источника подаваемыя, пред очами пастырей на горе стоящи, простертыми дланьми рук Твоих на источник сей указала еси. Тем же благодарни суще за таковую милость, от Тебе нам явленную, воспеваем Богу: Аллилуия.
Икос 5
Вся исполнися радости славному источнику, при горе Пюхтицкой людем дарованному и в купели его с верою омывающимся благодать и цельбу щедро подающему. Сего ради, со благодарением вопием Ти, Радости нашей, из бездны греха нас воскриляющей:
Радуйся, милостивно приемлющая души, к Богу взывающия; радуйся, помощь смиренным невидимо подающая. Радуйся, исцеление не токмо телесных, но и душевных язв от святаго источника изливающая; радуйся, благодать Свою во святей воде, по всей Российстей земли богомольцами разносимой, подающая. Радуйся, веру чистых сердец у святаго источника укрепляющая; радуйся, души жаждущих к Богу Крепкому, Живому от конец земли незримо в обитель Свою собирающая.
Радуйся, Любвеобильная, слезы сердец наших милостивно осушающая.
Кондак 6
Боготечную звезду, икону Твою чудотворную, тевтоны зряще, православными почитаему, восхотеша ересь лютерову зде насадити и святое место разорити. Людие же православнии к Тебе, Мати Милосердная, возопиша и приняти гору сию под покров Свой просиша, воспев Богу: Аллилуия.
Икос 6
Видя Православие в Эстляндии попираемо, а народ тевтонами угнетаем, Царь Российский, Великий Петр, с полки своими устремися на край Прибалтийский и покори и. Тако услышана бысть молитва к Царице Небесней о заступлении православия в стране сей. Сего ради вернии возопиша Ти сице:
Радуйся, веры православныя непобедимая поборнице; радуйся, исповедников веры незримая укрепительнице. Радуйся, уменьшением гонений число православных храмов зело умножившая; радуйся, увеличением чудотворений число колеблющихся в Православии зело уменьшившая. Радуйся, яко икона Твоя новоявленная усердием богомольцев златою ризою украсися; радуйся, яко подле древлей часовни новая в храм обращена бысть.
Радуйся, Любвеобильная, слезы сердец наших милостивно осушающая.
Кондак 7
Восхотев спасения верных дщерей под покровом Твоим, Богородице, заложи обитель зде святый праведник Кронштадтский и предрече стояти ей до скончания века благоукрашенною и долголетнею. Темже со благодарением поем Богу: Аллилуия.
Икос 7
В трудех и молитве на горе Богородицкой монастырь возросте и любы народную далече за пределы Эстляндскаго края сниска. Тако и на сей обители сбывается пророчество Исаиино о горе Сионстей реченное: Будет в последния дни явлена гора Господня и дом Божий на версе гор, и возвысится превыше холмов, и пойдут языцы мнози, и рекут: приидите, и взыдем на гору Господню и в дом Бога Иаковля, и возвестит нам путь Свой, и пойдем по нему». Темже радостно зовем Ти:
Радуйся, Благодатная, промышлением Божиим обитель Пюхтицкую создавшая; радуйся, тем пророчества Исаиина исполнение явившая. Радуйся, в дни наша высокое христианское подвижничество в житиях блаженных стариц людем показавшая; радуйся, примеру их следовати всех людей призвавшая. Радуйся, силу прозорливаго благословения приснопамятнаго батюшки Иоанна в изобилии милостей Божиих, на обитель изливаемых, явно показующая; радуйся, благодать духовную с верою припадающим к чудотворному образу Твоему щедро подающая.
Радуйся, Любвеобильная, слезы сердец наших милостивно осушающая.
Кондак 8
Благодарныя пастырю возлюбленному своему сестры пюхтицкия светозарный образ явления Твоего, о Пречистая, написаша и родному батюшке дароваша. Икона сия аки финикс красотою процвете и с праведником дивным до смерти пребысть. Он же до кончины своея к Тебе, Владычице Небесней, горячия молитвы о обители Успенстей возношаше. Не престанем славити Сына Твоего, Милосердная, радость сию нам ниспославшаго, умиленно поя: Аллилуия.
Икос 8
Пламенне возгоревся любовию к Тебе, Пречистей Божией Матери, пастырь Кронштадтский сподобися зрети Тя, Царицу Небесную, от иконы Своея милостивым и сладчайшим гласом к нему рекшую: «Милейшие есте, чада Отца Небеснаго». На пречистый лик Твой, Богородице, молитвенник земли Российския со трепетом воззрев, виде очи добрии, смиреннии, и душею умиленно воззва:
Радуйся, звездо пресветлая, Владычице, вся в сиянии Света-Бога пребывающая; радуйся, Святосте вечная, чистоту божественную от небес приимшая. Радуйся, преблагоукрашенный Храме Божий, избранная Невесто Духа Святаго; радуйся, Мати Живота, в скорбех и радостех тихое наше пристанище. Радуйся, Всеблагая Помощнице, сердца человеческие смиряющая; радуйся, Заступнице, духов злобы поднебесных прогоняющая.
Радуйся, Любвеобильная, слезы сердец наших милостивно осушающая.
Кондак 9
Дивное чудо совершися, егда икона Твоя, Владычице, святому праведнику дарованная, Промыслом Божиим во обитель вновь возвратися и лучами света невечерняго собор Успенский озари. Тако в открывшемся видении пастырю Кронштадтскому в соборнем храме богосветлою свещою возсия Пюхтицкая икона Твоя, Приснодево Непорочная. Темже, дивящеся таковому Твоему о сей иконе промышлению, явно показующему Твое к ней благоволение, умиленно поем Богу: Аллилуия.
Икос 9
Витийство лжеименнаго разума недоумевает прославляти неисчетная чудеса Твоя, во святых Твоих иконах людем православным являемая. Чистии же сердцем и простыя души видят во оных, яже гордии умом видя, не видят, и слыша не слышат. Славяще Твое ко кротцым и смиренним Божественное благоволение, вопием Ти:
Радуйся, в день Святыя Пасхи вестию о новом обретении иконы Твоея насельниц обители Пюхтицкия обрадовавшая; радуйся, милости Своя чрез Твое предстательство сестрам ниспосылающая. Радуйся, тайная желания ищущих духовнаго молитвеннаго общения с Тобою исполняющая; радуйся, пути их ко обители Твоей чудесно направляющая. Радуйся, сокровенная благоговейная помышления чтущих Тя ведующая; радуйся, намерения безраздельно служити Ти во обители Твоей к исполнению втайне приводящая.
Радуйся, Любвеобильная, слезы сердец наших милостивно осушающая.
Кондак 10
Спасти хотя возлюбивших чистоту телесную, а паче же и душевную, создала еси, Матерь Божия, обители монашествующих, яко звезды небесныя, сияющия в мире сем, прелюбодейнем и грешнем; и, яко крины сельныя, девственною чистотою украшенныя, с поля необъятнаго земной юдоли плача и скорби ревностных служительниц Себе избрала еси и во святых обителех Своих упасла еси. Сего ради ублажаем Тя, неувядаемый цвете чистоты, и воспеваем со страхом Богу: Аллилуия.
Икос 10
Стена еси девственным ликом и иночестим собором, Богородице Дево. Сего ради Ты веси, ихже подобает избрати в число непрестанно славящих имя Твое, паче же, почтити жезлом игуменским. Дивящеся промышлению Твоему об избранных Твоих егда пред иконою Твоею исполнила еси слезные моления игумении Алексии, послушания настоятельского ю свободивши, вопием Ти:
Радуйся, в день празднования Боголюбския иконы Твоея, на гору святую во образе иконы Пюхтицкия прибывшая; радуйся, тем слезы престарелыя игумении осушившая. Радуйся, никогоже из земнородных в тыя дни во обители Пюхтицкой во игумении не поставившая; радуйся, жезл игуменский во обители невидимо приимшая. Радуйся, утешение наше и надеждо спасения; радуйся, радосте наша несказанная.
Радуйся, Любвеобильная, слезы сердец наших милостивно осушающая.
Кондак 11
Пение хвалебное выну возносит Ти лик иночестий, восхваляя новое чудесное явление иконы Твоея вдове священника, монахине Евфросинии, в сонном видении образ Твой узревшей, дотоле ей неведомый. Слышав же Божественный глас, глаголющий: «Тебе помогу сию икону обрести. Ищи ю на горе», — долго искаше ю и обрете во обители Пюхтицкой, и, радостно признав виденный во сне Твой светозарный лик, Пречистая, благодарно возопи: Аллилуия.
Икос 11
Светоподательную свещу сущим во тьме греха и юдоли плача явившуюся, зрим Святую Деву, над горою Богородицкою стоящую и руци Своя долу простирающую, хотящи всех труждающихся и обремененных из мрака богоотступническаго жития сего возвести к свету богопознания. Уповающе на всемощное Твое предстательство у Престола Сына Твоего, Христа Бога нашего, и попечение нелицеприятное о душе христианстей, ко Господу стремящейся, вопием Ти сице:
Радуйся, ищущих спасения и уединеннаго сопребывания с Господом зрящая; радуйся, глад духовный алчущих и жаждущих правды щедро утоляющая. Радуйся, родителей, оскорбляемых чадами, отступившими от Господа, единое утешение; радуйся, чад, гонимых родителями, Бога забывших, необоримое укрепление. Радуйся, плачущих по усопшим христианское упование; радуйся, чающих жизни вечныя со Христом, непостыдное в ней уверение.
Радуйся, Любвеобильная, слезы сердец наших милостивно осушающая.
Кондак 12
Благодать Божия пребывает в чудесех преславных от святых икон Твоих по всей земли Российстей явленных, Пречистая и Преблагословенная Богородице Дево. Видяще благодать сию, явно действующую во образех Твоих, Пюхтицкой обители чудесно дарованных, и зряще в сем особое промышление Твое о Сионе Прибалтийскаго края, благодарно поем Промыслителю Богу: Аллилуия.
Икос 12
Поюще вся дивная чудеса Твоя от святых икон Твоих, о Мати Христа Бога нашего, просим и молим Тя: не отыми от нас милости Твоя безмерныя отступлений ради, и богохулений, и отречений от веры православныя, и иных грехов во оскорбление имени Божия нами совершенных, но сподоби нас до конца живота нашего во гресех содеянных раскаятися и прославляти Тя, Невместимаго вместившую, воспевающе Тебе сице:
Радуйся, цвете девства, жезл игуменский во святых обителех Твоих незримо держащая; радуйся, Богородице Одигитрие, христиан упование. Радуйся, Благая Скоропослушнице, вся прошения наша во благо исполняющая; радуйся, радосте наша, скорби и печали в радость претворяющая. Радуйся, Благодатная, лучами великия Своея милости всех освещающая; радуйся, Обрадованная, во успении Твоем нас не оставляющая.
Радуйся, Любвеобильная, слезы сердец наших милостивно осушающая.
Кондак 13
О Всепетая Мати, любвеобильная Заступнице православных людей Твоих, страждущих в безумнем мире сем. Призри на скорби и нужды наша, услыши моления наша, во смирении из глубины усталых сердец Тебе возносимыя. Очисти грехи наша и сподоби нас до конца дней наших нелицемерно взывати воплощшемуся от Тебе Спасителю нашему: Аллилуия.
(Этот кондак читается трижды, затем икос 1 и кондак 1)
Молитва
О Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред светозарным образом Твоим и смиренно молим: прости, Всемилостивая, вся заблуждения наша и вся оскорбления, в ведении или в неведении Сыну Твоему и Спасителю нашему от юности обильно нанесенная неисполнением заповедей Его святых, небрежением ко святыне, нерадением к молитве и нетерпением в несении креста нашего. Призри на жажду спасения и посильныя труды и пребуди с многогрешным, но оставшимся верным Сыну Твоему малым Его стадом по неложному слову Его, во Святем Евангелии реченному: «Не бойся, малое стадо, яко благоизволи Отец ваш дати вам Царство».
О животворящий источниче нашего утешения! К Тебе возносим смиренное сие моление и просим Матернего Твоего о нас заступления пред Престолом Отца нашего Небеснаго. Не лиши нас Царства сего благодатнаго за премногия грехи наша, ибо вемы, яко ничтоже внешнее и самолюбивое, гордое и тщеславное, ни славныя достижения мирския, ни добродетели, с тайным самолюбованием совершаемыя, ни степени, ни чины, ни самое иноческое звание не возмогут возвести нас в Царствие Небесное, токмо сердце чистое и дух сокрушенный и смиренный, за многия молитвенныя труды Духом Святым даруемыя. Помози нам оставшиеся дни жизни нашея в духе и истине покланятися Сыну Твоему, Милосердная Богородице, и, стяжавше нелицемерную любовь к Богу и ближнему, исполнити сию первейшую заповедь Господню, единую приводящую в Царство Небесное. Аще и недостойни есмы, сподоби нас соделатися чадами Божиими по благодати и наследовати жизнь вечную со всеми, в покаянии Богу угодившими, и введи нас, Мати Божия, язвами Сына Твоего Иисуса Претихаго в Небесный Чертог Его, дабы вечно славити и воспевати пречестное и великолепое имя Всесвятыя Троицы, Отца и Сына и Святаго Духа ныне и присно и во веки веков. Аминь.
